A comunidade de Montes denunciou os feitos ante a Confederación Hidrográfica e Medio Ambiente.
Persoal da concellería de Vías e Obras do Porriño e unha empresa contratada polo concello levaron a cabo obras na contorna do fonte do Souto, ubicada no lugar da Costeira, barrio do Rial, na parroquia de Atios. Nun principio as obras consistiron na entubaxe e soterramento do regato que sae da presa na que verte a fonte, para abrir alí unha especie de praza. Unha obra da que descoñecemos a súa urxencia, a súa utilidade e tampouco sabemos quen a demandou.
Imaxe da fonte antes e despois das obras.
A situación agravouse cando os operarios meteron as máquinas no sendeiro que da acceso á fonte, desconfigurando por completo o lugar: cortaron as árbores que lle daban sombra e frescura ao manancial, desbastaron cunha excavadora un penedo que sostén o muro de terra natural e, por se fora pouco, mesmo tocaron no cano da fonte, colocando unhas pedras que impiden a saída da auga. Por se o estrago non lles parecera suficiente, colocaron unha fileira de pedras, xuntadas con cemento, para elevar o muro rústico que hai dez anos construira o propio concello. Unha auténtica chapuza que estraga todo o encanto natural do lugar.
Ante a queixa dos veciños polos danos causados na fonte a xunta reitora da comunidade de Montes puxo as obras, que consideramos un atentado medioambiental, en coñecemento tanto da Confederación Hidrográfica do Miño-Sil como da Consellería de Medio Ambiente. Non atopamos sentido a unha actuación así. Era –porque xa non o é- unha das fontes mellor conservadas da parroquia. En tempos do goberno bipartito BNG-PSOE, o concello levara a cabo unha coidada restauración, limpando o manancial e protexéndoo cun muro rústico, sen cemento, que lle daba frescura e beleza ao lugar. Pero agora, estas obras, que non foron consultadas cos veciños, estragan por completo a paraxe. Descoñecemos por que o concello decidiu levalas á cabo e ignoramos se conta coas autorizacións correspondentes.
Ante a ausencia dunha Asociación de Veciños que eleve a voz contra estas tropelías, é a xunta de montes quen se fai eco das queixas dos veciños. Atios necesita investimentos máis urxentes e necesarios ca este. E moito nos tememos que esta actuación responda ao interese caciquil dalgún político que estea preparando xa o carrexo electoral. Temos entendido que un dos promotores desta desfeita é un coñecido cacique local, alcumado O Xeiteiro. Desgraciadamente por toda a parroquia hai sobradas mostras da “eficiencia e fermosura” das súas obras.
Exemplos da “utilidade” das obras feitas por este cacique.
Os veciños de Atios non merecemos personaxes “benefactoras” coma el, nin tampouco gobernantes que van por libre sen contar coa veciñanza.